У Смалявіцкім раёне адбудзецца абласное свята "Дзень роднай мовы"
Яно пройдзе ў рамках рэспубліканскага маладзёжнага праекта “Беларусь – крынiца натхнення” (г.Смалявічы, гарадскі маладзёжны цэнтр, вул. Савецкая, 123, пачатак – у 11.30).
Свята прымеркавана да Міжнарожнага Дня роднай мовы, які абвешчаны ЮНЕСКА.
На мерапрыемстве збяруцца актывісты Мінскай абласной арганізацыі БРСМ, сярод якіх пераможцы абласных анлайн-конкурсаў на лепшае выкананне песень і чытанне вершаў на беларускай мове, конкурсу сэлфі “Мая беларуская кніга”, што стартуюць 17 лютага. Свята пачнецца з напісання дыктоўкі, якая з’яўляецца традыцыйным сімвалічным актам “Дня роднай мовы” не толькі ў Беларусі, але і па ўсім свеце.
Асноўным дзеяннем свята стане беларуская інтэлектуальня гульня “Мая радзіма – Беларусь”, якая пройдзе ў фармаце паб-квіза. Пытанні будуць звязаны з роднай мовай, традыцыямі, культурай беларусаў. Па выніках гульні тры каманды-пераможцы атрымаюць сімвалічныя падарункі, прысвечаныя Году малой радзімы: кнігі класікаў беларускай літаратуры, якія нарадзіліся на Міншчыне.
Для ўдзельнікаў свята адбудзецца творчая канцэртная праграма, у якой прымуць удзел у тым ліку і пераможцы абласных конкурсаў на лепшае выкананне песень і чытанне вершаў на беларусскай мове.
Завершыцца свята кіналекторыем “Фільмы на беларускай мове як сучасны трэнд”.
Арганізатары мерапрыемства - Мінскі абласны камітэт грамадскага аб'яднання "Беларускі рэспубліканскі саюз моладзі”, галоўнае ўпраўленне ідэалагічнай работы, культуры і па справах моладзі Мінскага аблвыканкама і Смалявіцкі райвыканкам.
Крыніца - Выдавецкі дом «Звязда».