“Вецер у валасах” Юліі Алейчанка

Зборнік перакладаў Юліі Алейчанка “Вецер у валасах”, які выпушчаны ў свет Выдавецкім домам “Звязда” – своеасаблівае літаратурнае падарожжа па розных краінах свету. У ім па-беларуску гучаць вершы паэтаў Азербайджана, Казахстана, Кітая, Літвы, Расіі, Таджыкістана, Украіны.

Блізкія славянскія моўныя прасторы, цэнтральнаазіяцкі каларыт у вершах таджыка Нізома Касіма, Літва праз “акуляры” Майроніса, руская паэтычная сучаснасць праз вершы Андрэя Каровіна, якія вельмі ўражваюць фарматамі вершатворчасці, подых Паўночнага Каўказа з вершаў чачэнкі Лулы Куні, балкарца Саліха Гуртуева, далёкі і, пэўна, усё яшчэ намі не адкрыты Кітай. Столькі змяшалася, пераплялося ў адной невялікай кніжачцы.

Выданне выйшла ў свет пры фінансавай падтрымцы Міністэрства інфармацыі Рэспублікі Беларусь.

Ілюстрацыі да выдання зроблены беларускім мастаком азербайджанскага паходжання Камілем Камалам.