13 снежня а 13-й гадзіне ў кнігарні «КнігаПоліс» (г.Мінск, вул.Сурганава, 11) у рамках акцыі «Чытаем разам са «Звяздой», адбудзецца прэзентацыя кніг «Антошкин щенок» и «Колючая книжка» беларускага дзіцячага пісьменніка Віктара Ляскоўскага.
Віктар Ляскоўскі – добра вядомы дзецям пісьменнік. Калі вы замовіце яго вершы ці казкі ў бібліятэцы, хутчэй за ўсё пачуеце ў адказ, што ўсе кнігі зараз «на руках». Ці не гэта лепшы падарунак для аўтара? Пісаць для сучасных дзяцей вельмі няпроста, асабліва вершы: выразнага рытму, дакладнай рыфмы і цікавага зместу недастаткова, патрэбна штосьці незвычайнае, такое, што чапляе, гульня слоў і сэнсаў.
У творах Віктара Ляскоўскага ўсё гэта ёсць. Здаецца, што яны напісаныя самімі героямі, выдумшчыкамі і фантазёрамі. Калі ёсць аўтобусы-гармонікі, то куды схаваліся тралейбусы-раялі і трамваі-саксафоны? Куды будуць ставіць непаслухмяных дзяцей, калі праектаваць і будаваць дамы без вуглоў? Ці сапраўды так небяспечна гладзіць сабаку па хвасце: нават калі вельмі злы, не стане ж ён кусацца хвастом! Так жартуе аўтар і яго героі.
Запрашаем на прэзентацыю!
Інфармацыя падрыхтавана па матэрыялах ААТ «Белкніга».