Спецыяльна для юных чытачоў Цэнтральнай бібліятэкі імя Янкі Купалы горада Мінска выдавецтва арганізавала і правяло ў рамках рэспубліканскай акцыі “Культурны маршрут “Мая Беларусь: сучасныя пісьменнікі – дзецям” шэраг сустрэч з беларускімі аўтарамі і прэзентацыі кніжных навінак.
Адметнай стала сустрэча лаўрэата Дзяржаўнай прэміі, кандыдата філалагічных навук Васіля Зуёнка з малодшымі школьнікамі. Пісьменнік прачытаў вершы з кнігі “Запішыце мяне ў мядзведзі”, правёў літаратурную віктарыну.
З вялікім зацікаўленнем слухалі вучні Анатоля Бутэвіча, які расказаў пра таямніцы сваёй кнігі “Як Данік у Радзівілаўскае метро трапіў”.
Былі прадстаўлены новыя выданні серыі “Нашым дзеткам”. Ніна Галіноўская пазнаёміла пачаткоўцаў з другой сваёй кнігай гэтай серыі “Вясёлая пясочніца”, а Таццяна Мушынская – з новай кнігай “Мак таўклі камары”.
Падчас сустрэч аўтары адказалі на пытанні зацікаўленых чытачоў. Жадаючыя атрымалі аўтографы ад пісьменнікаў.