XXVIII Мінская міжнародная кніжная выстаўка-кірмаш адкрылася ў Мінску

XXVIII Мінская міжнародная кніжная выстаўка-кірмаш адкрылася ў Мінску

XXVIII Мінская міжнародная кніжная выстаўка-кірмаш адкрылася сёння ў адміністрацыйным комплексе па праспекце Пераможцаў, 14. Аб гэтым паведамілі ў Міністэрстве інфармацыі.

У гэтым годзе рабочы дзень выстаўкі будзе падоўжаны на гадзіну: 18-20 лютага з 10.00 да 20.00, 21 лютага з 10.00 да 17.00.

Удзел у выстаўцы пацвердзіў 281 экспанент з 20 краін - Аўстрыі, Азербайджана, Арменіі, Беларусі, Венесуэлы, Германіі, Ірана, Казахстана, Кітая, Кыргызстана, Малдовы, Пакістана, Палесціны, Расіі, Сірыі, Таджыкістана, Туркменістана, Турцыі, Узбекістана, Украіны.

"У гэтым годзе адзначаецца 30-годдзе стварэння СНД, што стала падставай для аб'яўлення цэнтральным экспанентам XXVIII Мінскай МКВК Садружнасці Незалежных Дзяржаў. Акрамя таго, Беларусь у юбілейны год з'яўляецца старшынствуючай у СНД", - адзначылі ў міністэрстве.

У розныя гады цэнтральным экспанентам Мінскай МКВК станавіліся Расія, Украіна, Ізраіль, Казахстан, Францыя, Германія, Венесуэла, КНР, Арменія, Вялікабрытанія, Сербія, ЗША. Кожная краіна прадстаўляла сваё кнігавыданне, прыўносіла на выстаўку новыя фарматы, забяспечвала яркую прэзентацыю сваёй краіны, што нязменна прыцягвала шматлікіх наведвальнікаў Мінскай МКВК. Злучаныя Штаты Амерыкі, напрыклад, запрашалі ў свет кнігі ЗША праз "прыдарожнае кафэ". Расійская Федэрацыя здзіўляла багаццем творчых кніжных навінак і іх прэзентацыяй знакамітымі аўтарамі, прапаноўвала паспрабаваць сябе ў якасці ўдзельніка стварэння аўдыякніг. Рэспубліка Сербія прыцягвала ўвагу да свайго стэнда прэзентацыяй кніжных навінак у спалучэнні з маладзёжнай субкультурай - графіці.

Общая.jpg

2021 год абяцае не быць выключэннем: наведвальнікаў чакаюць новыя імёны, новыя фарматы, новыя праекты.

"Цэнтральны экспанент - Садружнасць Незалежных Дзяржаў - прадвызначыў канцэпцыю забудовы нацыянальнай пляцоўкі Беларусі і дэвіз выстаўкі "Кніга аб'ядноўвае людзей і краіны". Галоўная экспазіцыя выстаўкі будзе сімвалічна аформлена ў стылі адзінага агульнага дома, які, зразумела, складаецца з пакояў. Гасціная, напрыклад, будзе аддадзена цэнтральнай пляцоўцы СНД, на якой наведвальнікі выстаўкі азнаёмяцца з кнігамі - ўладальнікамі Гран-пры міжнароднага конкурсу "Мастацтва кнігі" дзяржаў СНД за ўсе 17 гадоў правядзення. За гэты час беларускія кнігавыдаўцы сталі ўладальнікамі 164 дыпломаў у розных намінацыях, з іх 10 дыпломаў Гран- пры, у гэтай намінацыі Беларусь з'яўляецца лідарам", - падкрэслілі ў ведамстве. Акрамя гэтага, у ходзе выстаўкі краіны Садружнасці на стэндзе шырока прадставяць свае найбольш яркія кніжныя праекты.

Начала работу_3.jpg

У кабінеце пісьменніка будуць прадстаўлены лепшыя кнігі ўсіх краін СНД па гісторыі, культуры, мастацтве, пройдуць сустрэчы пісьменнікаў з наведвальнікамі выстаўкі. "Нязменна дзіцячая кніга з'яўляецца самай запатрабаванай у наведвальнікаў выстаўкі і пакупнікоў кніжных магазінаў. На дзіцячай пляцоўцы будзе прадастаўлена магчымасць не толькі ўбачыць кніжныя навінкі, даведацца аб стварэнні кніг, але і цікава правесці час бацькам з дзецьмі", - расказалі ў міністэрстве.

Арганізатары адзначылі, што самай "кніжнай" часткай цэнтральнай пляцоўкі выстаўкі стала імправізаваная кухня. "Тут будзе прадстаўлена максімальная колькасць кніг Беларусі, выдадзеных за адзін 2020 год (выпушчана каля 8200 кніг агульным тыражом больш за 21 млн экзэмпляраў). Наведвальнікі выстаўкі будуць мець магчымасць для стасункаў з аўтарамі, героямі кніг, акунуцца ў творчы працэс стварэння твораў нацыянальных аўтараў. На гэтай жа пляцоўцы адбудзецца першы ў краіне адбор праектаў для прыярытэтнага выдання дзяржаўнымі выдавецтвамі работ, якія перамаглі ў літаратурным стартапе LitUP", - прадоўжылі арганізатары.

Начала работу_4.jpg

Традыцыйны міжнародны сімпозіум "Пісьменнік і час" збярэ на сваёй дыскусійнай пляцоўцы творчых людзей - прадстаўнікоў пісьменніцкіх колаў усіх краін СНД, блізкага і далёкага замежжа, літаратараў Беларусі ў абласных цэнтрах, у культурнай сталіцы Рэспублікі Беларусь 2021 года Барысаве - для сустрэч, выступленняў і дыскусій. Трансляцыя сімпозіума плануецца на YouTube-канале, дзе можна будзе адрасаваць свае пытанні непасрэдна яго ўдзельнікам. Выступленні ўдзельнікаў па выніках сімпозіума плануецца выдаць у электронным і кніжным фармаце.

"У гэтым годзе мерапрыемства з улікам эпідэміялагічнай сітуацыі ў свеце і імкнення не зменшыць, а пашырыць колькасць удзельнікаў і краін, будзе праводзіцца ў тым ліку і ў рэжыме анлайн з дапамогай Zoom-канферэнцыі з цэнтральнай пляцоўкай у выставачным комплексе (непасрэдна на Мінскай МКВК), а таксама пляцоўках усіх абласных цэнтраў Беларусі, цэнтральнай бібліятэкі Барысава, краін СНД. Сімпозіум традыцыйна адбудзецца ў фармаце пленарнага пасяджэння, на якім удзельнікі абмяркуюць актуальныя пытанні літаратурнага і агульнацывілізацыйнага парадку дня, а таксама пройдуць творчыя сустрэчы замежных аўтараў са студэнтамі беларускіх сталічных ВНУ, семінары маладых літаратараў", - дадалі ў міністэрстве.

Начала работу_1.jpg

У час VII Міжнароднага сімпозіума літаратараў "Пісьменнік і час" удзельнікі абмяркуюць місію сучаснага пісьменніка, адказнасць пісьменніка перад тварам новых выклікаў часу, уплыў творчасці на працэс трансфармацыі сістэмы каштоўнасцей, ролю творчай інтэлігенцыі ў сучасным глабальным свеце, значэнне слова для захавання духоўна-маральных асноў і развіцця грамадства.

Беларусь у 2021 годзе багатая на юбілейныя даты беларускіх літаратараў, што стане нагодай для прэзентацыі вялікай колькасці кніжных праектаў ад беларускіх выдавецтваў, паглыбіць у іх творчасць наведвальнікаў выстаўкі. На цэнтральнай сцэне па традыцыі пройдуць прэзентацыі найбольш значных кніжных праектаў, узнагароджанне пераможцаў нацыянальнага конкурсу "Мастацтва кнігі". У тэатрах і кінатэатрах, на тэлеканалах у дні работы выстаўкі адбудуцца паказы фільмаў, спектакляў паводле твораў вядомых пісьменнікаў Беларусі і іншых краін.

Начала работу_7.jpg

У сувязі з існуючай эпідэміялагічнай абстаноўкай удзельнікам і наведвальнікам выстаўкі рэкамендуецца захоўваць масачны рэжым і дыстанцыраванне.

Усе жадаючыя змогуць даехаць да месца правядзення на традыцыйным паэтычным аўтобусе, які будзе курсіраваць ад станцыі метро "Няміга" да выставачнага комплексу на праспекце Пераможцаў, 14, і адначасова пачуць у дарозе творы знакамітых аўтараў. Праезд на ім будзе бясплатным, як і ўваход на сам кніжны форум.

Крыніца - БЕЛТА.

Апублікавана:
Праглядаў:
212
Крыніца: