У Беларусі стартаваў конкурс кароткіх відэаролікаў «Мая гісторыя з Кітаем»

Падчас урачыстай цырымоніі міністр інфармацыі звярнуў увагу, што развіццё адносін паміж Беларуссю і Кітаем сёння выходзіць на новы ўзровень - чалавечых адносін, а таксама падкрэсліў стратэгічную важнасць праекта:

"Тыя намаганні, якія былі зроблены кіраўніком нашай дзяржавы, Прэзідэнтам Аляксандрам Лукашэнкам, і Старшынёй КНР Сі Цзіньпінам, сёння выводзяць двухбаковыя адносіны на якасна новы ўзровень. Гэта не толькі палітычныя кантакты і эканамічнае супрацоўніцтва, якія ляжаць у аснове адносін паміж дзяржавамі. Гэта ўжо чалавечае вымярэнне - самае дарагое, дзеля чаго працуюць палітыкі. Гэта стварэнне трывалых сувязей і аснова для мірнага партнёрства і развіцця".

У сваю чаргу Надзвычайны і Паўнамоцны Пасол КНР у Рэспубліцы Беларусь Чжан Вэньчуань падкрэсліў значэнне самога фармату кароткіх відэаролікаў для ўмацавання дыялогу паміж народамі:

"Кароткія відэаролікі здольныя пераадольваць геаграфічныя адлегласці і разбураць моўныя бар’еры, становячыся важным сродкам перадачы культуры. Кожны, хто трымае ў руках камеру, можа стаць і апавядальнікам сваёй гісторыі, і ўдзельнікам міжкультурнага дыялогу".

Да ўдзелу ў конкурсе запрашаюцца ўсе беларусы, якія хочуць падзяліцца ўласным вопытам знаёмства з Кітаем. Сярод рэкамендаваных тэм - гісторыя вывучэння кітайскай мовы, уражанні ад паездак у Кітай, знаёмства з кітайскай культурай, а таксама асабістыя гісторыі, звязаныя з беларуска-кітайскай дружбай.

Арганізатарам конкурсу выступае пасольства КНР у Беларусі пры падтрымцы Міністэрства інфармацыі.