«Васiльковае поле Айчыны» на бялыніцкай зямлі
У гэтым годзе сталiцай Дня беларускага пiсьменства стануць Бялынiчы. Традыцыйна выдавецтва «Мастацкая лiтаратура» iмкнецца пазнаёмiць чытачоў з лiтаратурнай спадчынай зямлi, дзе адбудзецца свята. У зборнiку «Васiльковае поле Айчыны» прадстаўленыя аўтары розных эпох, якiя маюць дачыненне да Бялынiччыны — нарадзiлiся на ёй альбо нейкi час жылi.
Першая персаналiя зборнiка — пiсьменнiк XIX стагоддзя Зянон Фiш. Ён нарадзiўся ў Бялынiчах: ягоны бацька, прафесар‑лiнгвiст, ажанiўся з дачкой мясцовага памешчыка‑арандатара. Зянон Фiш пiсаў на польскай мове пад псеўданiмам Тадэвуш Падалiца, але адлюстроўваў рэалii Украiны, дзе доўгi час пасля жыў. Праславiўся палемiкай з расiйскiм акадэмiкам Мiкалаем Кастамаравым, у якой даказваў права народаў на самавызначэнне.
Цiкавыя i прыклады паэтычнай творчасцi Васiля Жудро, якi на мяжы XIX i ХХ стагоддзяў быў святаром праваслаўнага храма на Бялынiччыне.
Чытач сустрэне ўрывак з папулярнага рамана ўраджэнкi Бялынiчаў Наталлi Батраковай «Миг бесконечности» i ўрывак рамана «Карчоўскiя прыгоды Банiфацыя» Мiхася Карпечанкi, складальнiка зборнiка.
Выдатны мастак Вiтольд Бялынiцкi‑Бiруля адлюстраваў у сваiх карцiнах краявiды роднай Бялынiччыны, але пакiнуў i лiтаратурную спадчыну: чытач пазнаёмiцца з яго апавяданнем «Лисья охота».
Вядомы музыка Юрый Несцярэнка таксама мае лiтаратурны талент, у яго шчырых апавяданнях можна вычытаць рэалii колiшняй беларускай рок‑тусоўкi. «Былiннай лясной стараной» называе малую радзiму паэт Змiтрок Марозаў.
Зрэшты, паэтычныя скарбы края багата прадстаўлены вершамi Аляксандра Мельнiкава, Рыгора Сарокi, Вiктара Хаўратовiча, Антона Шчырыцы, Рыгора Яўсеева, Васiля Дзеравяшкi ды iншых творцаў. А iлюстрацыi дапамогуць больш яскрава ўявiць край, якi iх натхняў.
Ларыса Рублеўская
Інфармацыя падрыхтавана па матэрыялах “СБ. Беларусь сегодня”.