Чакаецца да 150 заявак ад СМІ для ўдзелу ў рэспубліканскім творчым конкурсе "Пад знакам Года малой радзімы", паведаміла сёння журналістам намеснік начальніка інфармацыйна-аналітычнага ўпраўлення Міністэрства інфармацыі Галіна Гусакова.

"Цяпер складана сказаць, колькі ў выніку паступіць заявак на конкурс, але мы ўжо адчулі актыўнасць рэгіянальных СМІ ў першыя дні яго аб'явы. Паступае вельмі шмат званкоў, зваротаў на сайт, нам пішуць, задаюць пытанні. Рэгіянальныя журналісты з вялікім задавальненнем заўсёды пішуць аб сваёй малой радзіме і зацікаўлены ў тым, каб максімальна шырока данесці гэтую інфармацыю. Я думаю, што заявак будзе ад 120 да 150, не менш. І матэрыялы, якія рыхтуюцца на конкурс, павінны быць досыць разнастайнымі, распавядаць не толькі аб тых падзеях, якія адбываюцца ў малых гарадах і вёсках, але і аб гісторыі, традыцыях рэгіёну",- распавяла Галіна Гусакова. 

Паводле яе слоў, з улікам маштабнасці абранай тэматыкі, конкурс стане доўгачасовым. "На мой погляд, тэматыка малой радзімы - бяздоннае мора, якое можна чэрпаць бясконца, гэта цікава, займальна, павучальна. Любоў да роднай зямлі - тое, што трэба максімальна паказваць. Не выключана, што лепшыя работы пераможцаў будуць размешчаны на нашым сайце, каб гэтай інфармацыяй маглі скарыстацца як радавыя грамадзяне, так і самі СМІ. Гэта магчымасць яшчэ раз паказаць, што кожны населены пункт Беларусі - цікавае месца, куды можна з'ездзіць і даведацца што-нешта новае", - падкрэсліла прадстаўнік Мінінфарма. 

Асаблівую ўвагу арганізатары звярнулі на намінацыі, адзначыла Галіна Гусакова. "Мы пастараліся, каб было тэматычная разнастайнасць. Працы на конкурс прадстаўляюцца ў такіх намінацыях, як "Землякі", "Традыцыі і гісторыя роднага краю", "У Год малой радзімы - вялікія справы", "Малая радзіма ў фотаздымках". Цяпер ідзе прыём заявак, у пачатку наступнага года журы ў кожнай з намінацый вызначыць пераможцаў. Цырымонію ўзнагароджання плануем правесці ў лютым", - падкрэсліла яна. 

Як чакаецца, лаўрэаты конкурсу будуць узнагароджаны дыпломамі Міністэрства інфармацыі 1, 2 і 3 ступені. Акрамя таго, па рашэнні журы найбольш актыўныя ўдзельнікі могуць быць адзначаны спецыяльнымі дыпломамі, прызамі і іншымі ўзнагародамі.

Асноўныя мэты конкурсу - рэалізацыя задач дзяржаўнай інфармацыйнай палітыкі ў развіцці рэгіёнаў, фарміраванне павагі да малой радзімы, паказ яркіх дасягненняў па захаванню і адраджэнню роднага краю, садзейнічанне выхаванню ў моладзі патрыятызму і любові да Радзімы праз паняцце "малая радзіма", фарміраванні актыўнай жыццёвай пазіцыі маладога пакалення.

Уся неабходная інфармацыя і палажэнне аб конкурсе размешчаны на сайце Міністэрства інфармацыі.