Семінар маладых літаратараў “Першацвет” збярэ лепшыя літаратурныя сілы пачынаючых творцаў Беларусі

Ініцыятыву Саюза пісьменнікаў Беларусі даць штуршок новай літаратурнай плыні падтрымала Міністэрства інфармацыі Рэспублікі Беларусь. Сярод шматлікіх мерапрыемстваў XXIV Мінскай міжнароднай кніжнай выставы-кірмашу гэтай падзеі надаецца асаблівае значэнне.

Па словах міністра інфармацыі Рэспублікі Беларусь Ліліі Ананіч, гэта дазволіць выявіць новую творчую моладзь, захопленую пісьменніцкай справай. Праведзеныя прафесійнымі пісьменнікамі заняткі ў секцыях прозы, паэзіі, крытыкі, перакладу дапамогуць маладым літаратарам ва ўдасканаленні сваіх твораў. Адна з роляў кніжнай выставы як раз і заключаецца ў тым, каб далучаць да творчасці новых аўтараў, презентаваць іх выданні на будучых кніжных форумах.

Старшыня Саюза пісьменнікаў Беларусі Мікалай Чаргінец падзею падобнага кшталту  такім чынам звязвае з яе далейшым перспектыўным гучаннем: “Мы за новыя імёны ў літаратуры і за магчымасць абнавіць творчы склад Саюза маладымі літаратарамі. Упрыватнасці, гэтага чакае чытач, якога цікавіць погляд  маладых творцаў на рэаліі сучаснага супярэчлівага свету.  Гэта літаратура будучага,  падмурак якой ствараем сёння”.

Удзел у семінары маладых літаратараў прымуць пераможцы міжнароднага літаратурнага конкурсу “Першацвет”, заснавальнікамі якога з’яўляюцца Выдавецкі дом “Звязда” і выдавецтва “Мастацкая літаратура”.  У якасці ўзнагароды кожны з  асабліва адзначаных журы конкурсу аўтараў атрымае  выдадзены зборнік “Першацвет”. Да актыўных удзельнікаў  семінара далучацца і маладыя творчыя галасы з усёй рэспублікі. Гэтыя аўтары ўжо заявілі аб сабе на старонках літаратурных выданняў нашай краіны, многія зрабілі пробы пяра за мяжой, сталі пераможцамі літаратурных конкурсаў рознага масштабу. Літаратальна кожны з пачаткоўцаў выдаў у свет сваю першую кніжку. 

У першы дзень работы выставы – у 14.30 адбудзецца ўзнагароджанне пераможцаў міжнароднага конкурсу маладых літаратараў “Першацвет”. Падчас урачыстасці спецыяльныя прэміі Саюза пісьменнікаў Беларусі атрымаюць “Лепшы малады празаік” і “Лепшы малады паэт”. Выступяць і самі маладыя творцы. Яны прэзентуюць свой  зборнік “Першацвет”, выдадзены “Мастацкай літаратурай”.

9 снежня 2017 года маладыя літаратары, а гэта амаль 50 паэтаў перакладчыкаў, крытыкаў, перакладчыкаў, прымуць удзел у пленарным паседжанні Міжнароднага сімпозіўма  літаратараў “Пісьменнік і час”, які пачнецца ў 11.00 у Нацыянальнай бібліятэцы Беларусі.

У 14.30 пачнуць сваю працу секцыі. Размову аб творчасці будуць весці знакамітыя майстры слова – мадэратары секцый  Віктар Шніп, Валянціна Паліканіна, Міхась Пазнякоў, Алесь Бадак, Зіновій Прыгодзіч, Сяргей Трахімёнак,  Анатоль Андрэеў, Ірына Шаўлякова, Яўген Гарадніцкі, Мікола Мятліцкі, Юлія Алейчанка, Адам  Шостак. Кожны з іх загадзя пазнаёміўся з творамі маладых літаратараў і гатовы зрабіць кампетэнтны аналіз іх літаратурных памкненняў. 

У 17.00 у галерэі “Лабірынт” Нацыянальнай бібліятэкі Беларусі будуць падведзены вынікі семінара маладых літаратараў.